Почитувани родители, драги наши ученици,
Со голема радост и возбудување Ве известуваме дека Основното општинско училиште „Блаже Конески“ – Велес, целосно подготвено, на 1 септември 2025 година, понеделник ќе ги отвори вратите и ќе го започне воспитно-образовниот процес за новата учебна 2025/2026 година.
Во изминатиот период, преку вложувања, проекти и континуирана поддршка, училиштето вложи во унапредување на инфраструктурата, модернизација на наставните средства и создавање пријатна и безбедна средина за сите ученици и наставници. Нашата цел е да обезбедиме квалитетно образование, инспиративна атмосфера и мотивација за постигнување лични и заеднички успеси.
Првачиња – најтопло добредојде!
Нашите најмали, учениците во Прво одделение, со нивните родители, ги очекуваме на свечен прием во поливалентниот простор на училиштето во период од 9:15 до 9:30 часот. Во 9:30 часот ќе започне кратка забавна програма со наслов: „Ајде на училиште!“, подготвена од нивните поголеми другарчиња.
По завршувањето на програмата, учениците ќе бидат повикани од нивните наставнички и заедно ќе заминат во нивните училници – нивниот нов свет на пријателства, откривања и успеси.
Настава за останатите ученици
– Ученици од II до IV одделение:
Наставата започнува во 7:30 часот. На првиот ден нема да има храна и продолжен престој. Учениците од II одделение ќе бидат пречекани од нивните наставници кај влезот за првооделенци и ќе бидат упатени во нивните училници.
– Ученици од V до IX одделение – распоред во смени:
· Прва смена (од 7:30 часот)
o V-3 и V-4 одделение
o VI одделение
o VIII одделение
· Втора смена (од 13:00 часот):
o V-1 и V-2 одделение
o VII одделение
o IX одделение
Учениците од VI одделение ќе бидат пречекани во поливалентниот простор од нивните одделенски раководители во 7:30 часот, по што заедно ќе се упатат во своите матични училници.
Вашите деца се наша инспирација, наша гордост и наша иднина. Ние, наставниот кадар, стручната служба, директорот и сите вработени во училиштето, со љубов, почит и професионализам ќе вложиме максимални напори да ги поддржиме во процесот на учење, раст и развој.
Ќе ги мотивираме да сонуваат големи соништа, да стекнуваат нови знаења и вештини, и да ги откриваат своите потенцијали во пријателска и сигурна средина.
На сите ученици им посакуваме успешен и среќен почеток, многу нови пријателства, насмевки, радости и меѓусебно почитување!
Среќна и успешна нова учебна година!
Со почит, ООУ „Блаже Конески“ – Велес